top of page

രാമസ്വാമി അയ്യരുടെ മകൾ | ഫമിലിയ/മൈസ്റ്റോറി | മേരി ഹേമലത | KAIROS MALAYALAM | APRIL 2025

മേരി ഹേമലത
4 days ago
3 min read

എന്നെ വഴി നടത്തിയ വചനം

''ദൈവത്തെ സ്‌നേഹിക്കുന്നവര്‍ക്ക്, അവിടത്തെ പദ്ധതിയനുസരിച്ച് വിളിക്കപ്പെട്ടവര്‍ക്ക്, അവിടന്ന് സകലവും നന്മയ്ക്കായി പരിണമിപ്പി ക്കുന്നു എന്ന് നമുക്കറിയാമല്ലോ''

റോമാ 8, 28).


ജീവിതത്തില്‍ ഏറ്റവുമധികം സ്വാധീനിക്കുകയും സ്പര്‍ശിക്കുകയും ചെയ്ത ദൈവവചനം ഏതെന്ന് പലപ്പോഴും പലരും എന്നോട് ചോദിച്ചിട്ടുണ്ട്. അപ്പോഴൊക്കെ ഒരു സംശയവും കൂടാതെ ഞാന്‍ പറയാറുള്ളതും എന്റെ മനസ്സില്‍ എപ്പോഴും നിലനില്‍ക്കു ന്നതുമായ ഒരു ദൈവവചനമാണ് മുകളില്‍ ഉദ്ധരിച്ചത്. കാരണം ഈ ദൈവവചനം എന്റെ ജീവിതവുമായി വളരെയധികം ബന്ധപ്പെട്ടിരിക്കുന്നുവെന്ന് ഞാന്‍ ഉറച്ചു വിശ്വസിക്കുന്നു. എന്റെ ജീവിതത്തിലെ ക്രിസ്തുവിന്റെ അനന്തമായ സ്‌നേഹത്തെക്കുറിച്ചും, ഇടപെടലുക ളെക്കുറിച്ചും ചിന്തിക്കുമ്പോഴൊക്കെയും ഈ ദൈവവചനം എന്റെ മനസ്സില്‍ തെളിഞ്ഞു വരാറുണ്ട്. മറ്റു വാക്കുകളില്‍ പറഞ്ഞാല്‍ എന്റെ ജീവിത ത്തിലുടനീളം എനിക്ക് ശക്തി പകര്‍ന്നതും മാര്‍ഗദീപമായതും ഈ വചനമാണെന്ന് ഞാന്‍ വിശ്വസിക്കുന്നു.


എന്റെ ജീവിതത്തിലെ ദൈവികപദ്ധതികള്‍


തൃശ്ശൂര്‍ പാട്ടുരായ്ക്കലുള്ള ഒരു ബ്രാഹ്‌മണ കുടുംബത്തിലാണ് ഞാന്‍ ജനിച്ചത്. ഞാന്‍ ജനിക്കുമ്പോള്‍ എന്റെ അച്ഛന്‍ രാമസ്വാമി അയ്യര്‍ക്ക് 50 വയസ്സും എന്റെ അമ്മ മീനാക്ഷിക്ക് 40 വയസ്സും ആയിരുന്നു പ്രായം. അവരുടെ ജീവിതത്തിലേക്ക് വളരെ വൈകിയെത്തിയ എന്നെ മറ്റുള്ളവര്‍ക്ക് പരിചയപ്പെടുത്തുമ്പോള്‍ അച്ഛന്‍ അഭിമാനപൂര്‍വം പറയാറുള്ളത് ഞാന്‍ അച്ഛന്റെ വിരമിക്കല്‍ ആനുകൂല്യമാണ് എന്നായിരുന്നു. പതിനൊന്നാമത്തെ വയസ്സില്‍ അമ്മയെ നഷ്ടപ്പെട്ട എനിക്ക് ഡിഗ്രിക്ക് പഠിക്കുമ്പോള്‍ അച്ഛനെയും നഷ്ടമായി. എന്നെക്കാള്‍ മുതിര്‍ന്നവരായിരുന്ന സഹോദരിമാര്‍ അവരുടെ ജീവിതവുമായി മുന്നോട്ടു പോയ്‌ക്കൊണ്ടിരുന്നു. അങ്ങനെ ഒരു സാഹചര്യ ത്തില്‍ എന്റെ ജീവിതത്തില്‍ അനുഭവപ്പെട്ടുകൊണ്ടിരുന്ന ശൂന്യത യിലേക്കാണ് ഈശോ അനന്തസ്‌നേഹമായി കടന്നുവന്നത്. ഇന്ന് ആലോചിച്ചു നോക്കുമ്പോള്‍ ഈ ജീവിതസാഹചര്യങ്ങളിലൂടെയെല്ലാം ദൈവം എനിക്കുവേണ്ടി ഒരു പദ്ധതി ഒരുക്കുകയായിരുന്നുവെന്ന് എനിക്ക് വ്യക്തമാകുന്നു.


ഗവണ്‍മെന്റ് സ്‌കൂളില്‍ മലയാളം മീഡിയത്തില്‍ പഠിച്ചിരുന്ന എന്നെ, അമ്മയുടെ മരണശേഷം അച്ഛന്‍ ഹോളി ഫാമിലി കോണ്‍വെന്റ് സ്‌കൂളില്‍ ചേര്‍ത്തപ്പോഴായിരുന്നു വ്യക്തമായി ദൈവിക ഇടപെടല്‍ നടന്നത്. അമ്മയില്ലാത്ത കുട്ടി എന്ന പ്രത്യേക പരിഗണനയിലാണ് ഗവണ്‍മെന്റ് സ്‌കൂളില്‍ പഠിച്ചിരുന്ന എന്നെ അച്ഛന്‍ ഒരു ക്രിസ്തീയ സ്ഥാപനത്തില്‍ ഇംഗ്ലീഷ് മീഡിയത്തില്‍ ചേര്‍ത്തു പഠിപ്പിച്ചത്. കോണ്‍വെന്റിന്റെ ഭിത്തിയില്‍ അനന്തകാലം മുതല്‍ എന്നെ കാത്തു നിന്നതുപോലെയുള്ള ക്രിസ്തുവിന്റെ ക്രൂശിതരൂപം ഞാന്‍ ആദ്യമായി കണ്ടു. ആ കാഴ്ച എന്നെ വല്ലാതെ നൊമ്പരപ്പെടുത്തി. ഒരു ബ്രാഹ്‌മണ കുടുംബത്തില്‍ ജനിച്ചു വളര്‍ന്ന എനിക്ക് ക്രിസ്തുവും ക്രിസ്തുവിന്റെ ക്രൂശിലെ സഹനവും എല്ലാം തീര്‍ത്തും അപരിചിതമായിരുന്നു. ആ ക്രൂശിത രൂപത്തിലേക്ക് വിസ്മയത്തോടെയും വേദനയോടെയും നോക്കിനിന്ന എന്റെ മനസ്സിലേക്ക് യേശു എക്കാലവും എന്നോടൊപ്പം ആയിരിക്കാന്‍ വേണ്ടി കുടിയേറുകയായിരുന്നു.


എന്റെ വിദ്യാഭ്യാസവും ഈശോയുടെ ഇടപെടലുകളും ഈശോ എന്നെ അത്യധികമായി സ്‌നേഹിക്കുന്നുണ്ടെന്നും എനിക്കുവേണ്ടി അനാദികാലം മുതലേ ഒരു പദ്ധതി തയ്യാറാക്കിയിട്ടുണ്ടെന്നും അത് എന്റെ നന്മയ്ക്കുവേണ്ടി മാത്രമാണെന്നും തെളിയിക്കുന്നതായിരുന്നു പിന്നീടുള്ള എന്റെ ജീവിതത്തിലെ ഓരോ അനുഭവവും. സാധാരണഗതിയില്‍ മൂന്നുവര്‍ഷംകൊണ്ട് പൂര്‍ത്തിയാക്കാന്‍ സാധിക്കുന്ന ഡിഗ്രി പഠനം ഞാന്‍ പൂര്‍ത്തിയാക്കിയത് 9 വര്‍ഷം എടുത്താണ്. അന്നൊന്നും ഈ കാലതാമസത്തിന്റെ കാരണം എനിക്ക് മനസ്സിലായില്ലെങ്കിലും ഇന്ന് അതെല്ലാം എനിക്ക് വ്യക്തമായി മനസ്സിലാക്കാന്‍ സാധിക്കുന്നു. ആദ്യത്തെ രണ്ടുവര്‍ഷം കൊമേഴ്‌സ് എന്ന വിഷയത്തിലും, പിന്നീട് നാലുമാസം ഇക്കണോമിക്‌സ് വിഷയത്തിലും പഠനം തുടര്‍ന്നെങ്കിലും അതൊന്നും പൂര്‍ത്തിയാക്കാന്‍ പലവിധ കാരണങ്ങളാല്‍ എനിക്ക് സാധിച്ചില്ല. ഇതിനിടയില്‍ എനിക്കുണ്ടായ ആഴമേറിയ ക്രിസ്തു അനുഭവത്തെ തുടര്‍ന്ന്, ഉത്തമ ബോധ്യത്തോടെ 1982 ഡിസംബര്‍ എട്ടാം തീയതി ഞാന്‍ കത്തോലിക്കാ സഭയിലെ അംഗമായി മാറി. ''ക്രിസ്തുവില്‍ ആയിരിക്കുന്നവന്‍ പുതിയ സൃഷ്ടിയാണ്'' (2 കോറി 5, 17). അങ്ങനെ ഹേമലത രാമസ്വാമി എന്ന ഞാന്‍ മേരി ഹേമലതയായി മാറി. അതിനുശേഷം 1983 മുതല്‍ 86 വരെ മൂന്ന് വര്‍ഷം കൊണ്ട് ഞാന്‍ ആംഗലേയ സാഹിത്യത്തില്‍ ബിരുദമെടുത്തു. അതേതുടര്‍ന്ന് സി.എസ്.എസ്.ടി സന്യാസഭയിലെ അംഗമായിരുന്ന, മരണമടഞ്ഞ സിസ്റ്റര്‍ ലോരേറ്റ വഴി ഈശോ ഇംഗ്ലീഷ് സാഹിത്യത്തില്‍ ബി.എഡ് നേടുവാന്‍ എന്നെ സഹായിച്ചു. അതിനു ശേഷം ഇശോയുടെ പദ്ധതി പ്രകാരം സിസ്റ്റര്‍ ക്ലിയോപാട്ര (late) വഴി ഒരു ഇംഗ്ലീഷ് അധ്യാപിക യാകാനും എനിക്ക് സാധിച്ചു.


അധ്യാപന ജീവിതം

ദൈവം എന്നെ കൈപിടിച്ചു വഴിനടത്തുന്ന അത്ഭുതകരമായ അനുഭവ ങ്ങളായിരുന്നു പിന്നീട് എന്റെ ജീവിതത്തിലുണ്ടായത്. എന്റെ സുദീര്‍ഘമായ അധ്യാപന ജീവിതകാലത്ത് ക്രൂശിതന്റെ സ്‌നേഹ സാന്നിധ്യത്തെക്കുറിച്ച് ആഴത്തില്‍ അനുഭവിച്ചറിയാനും, അത് എന്റെ മുന്നിലെത്തുന്ന കുട്ടികള്‍ക്ക് പകര്‍ന്നുകൊടുക്കാനും ദൈവം എന്നെ അനുഗ്രഹിച്ചു. കൊച്ചു സ്വര്‍ഗത്തിലെ ആ കുട്ടികള്‍ ഇന്നും ഈശോയുടെ സ്‌നേഹ സാന്നിധ്യത്തെ അനുസ്മരിപ്പിച്ചുകൊണ്ട് നിരന്തരമായി പരസ്പരം സ്‌നേഹബന്ധം പുലര്‍ത്തുന്നു. സമൂഹത്തിന് ഗുണകരമായ ഒരു പ്രതിസംസ്‌കാരത്തിനുവേണ്ടി നിലകൊള്ളാന്‍ അവരില്‍ പലര്‍ക്കും കഴിയുന്നുവെന്നത് അഭിമാനം നല്‍കുകയും ഒപ്പം ഈശോയുടെ പദ്ധതിയെക്കുറിച്ചുള്ള ഉറച്ച ബോധ്യം നല്‍കുകയും ചെയ്യുന്നു. ഒരു ഇംഗ്ലീഷ് അധ്യാപികയായിരുന്നതുകൊണ്ട് കോവിഡ് കാലത്ത് പ്രശസ്ത വചന പ്രഘോഷകയായ സിസ്റ്റര്‍ ഗ്രേസ് തോമസിന്റെ 'തിരിച്ചറിവിന്റെ സുഗന്ധം' എന്ന പുസ്തകം ഇംഗ്ലീഷിലേക്ക് തര്‍ജമ ചെയ്യാന്‍ ദൈവം അവസരം തന്നു.


ഏകസ്ഥ ജീവിതം


''എന്റെ കര്‍ത്താവായ യേശുക്രിസ്തുവിനെപ്പറ്റിയുള്ള ജ്ഞാനം കൂടുതല്‍ വിലയുള്ളതാകയാല്‍, സര്‍വവും നഷ്ടമായിത്തന്നെ ഞാന്‍ പരിഗണിക്കുന്നു. അവനെ പ്രതി ഞാന്‍ സകലതും നഷ്ടപ്പെടുത്തുകയും ഉച്ഛിഷ്ടം പോലെ കരുതുകയും ആണ്. ഇത് ക്രിസ്തുവിനെ നേടുന്നതിനും അവനോടുകൂടെ ഒന്നായി കാണപ്പെടുന്നതിനും വേണ്ടിയത്രേ'' (ഫിലി 3, 8-9). എന്നെ സ്‌നേഹിച്ചതുകൊണ്ട്, എനിക്കുവേണ്ടി പദ്ധതികള്‍ ഒരുക്കിയ, എല്ലാം എന്റെയും സമൂഹത്തിന്റെയും നന്മയ്ക്കായി പരിണമിപ്പിച്ച യേശുവിനെ മറ്റെന്തിനേക്കാളും ഉപരിയായി സ്‌നേഹിക്കാന്‍ എനിക്ക് അവന്‍ കൃപ നല്‍കിയിരിക്കുന്നു. ഇനി മുന്നോട്ടുള്ള യാത്രകളില്‍, ഞാന്‍ യേശുവിനെ സ്‌നേഹിക്കുന്നതുകൊണ്ട്, എല്ലാം നന്മയ്ക്കായി തന്നെ ഭവിക്കുമെന്ന് ഉറച്ചു വിശ്വസിച്ചുകൊണ്ട് ആ സ്‌നേഹത്തോടൊപ്പം ആയിരിക്കാന്‍ ആഗ്രഹിക്കുന്നു. ഈ ജീവിതം എന്റെ പദ്ധതി പ്രകാരം ഞാന്‍ മുന്നോട്ടു കൊണ്ടുപോകുമായിരുന്നെങ്കില്‍ വിശേഷപ്പെട്ടതായി ഒന്നുംതന്നെ ചെയ്യുവാന്‍ എനിക്ക് സാധിക്കുമായിരുന്നില്ല. ഇന്നും എന്റെ പ്രാര്‍ഥന ആവശ്യപ്പെടുന്ന എല്ലാവര്‍ക്കും വേണ്ടി ഞാന്‍ ചെയ്യാറുള്ളത് ഒരു സ്വര്‍ഗസ്ഥനായ പിതാവേ എന്ന പ്രാര്‍ഥനയും മൂന്നു നന്മ നിറഞ്ഞ മറിയവും ത്രിത്വ സ്തുതിയും ചൊല്ലി കാഴ്ചവയ്ക്കുക എന്നതാണ്. ഈശോയെ സ്‌നേഹിക്കുന്നവര്‍ക്ക്, എന്നും ഏറ്റവും ശ്രേഷ്ഠമായത് നല്‍കാന്‍ അവിടന്ന് സന്നദ്ധനാണ്. ആ സ്‌നേഹത്തണലില്‍, ദൈവിക പദ്ധതിയുടെ കീഴില്‍ നമ്മള്‍ വിനീതരായി നിന്നു കൊടുത്താല്‍ മാത്രം മതി. ഒരിക്കല്‍ കൂടി ദൈവഹിതത്തിന് നമുക്ക് പരിപൂര്‍ണമായി നമ്മെത്തന്നെ സമര്‍പ്പിക്കാം.


മേരി ഹേമലത: 1982ല്‍ ജെറോം പിതാവില്‍ നിന്ന് മാമോദീസയും സ്ഥൈര്യലേപനവും സ്വീകരി ച്ചു. ഫാ. ഫ്രാന്‍ സിസ് കണ്ണിക്കല്‍ എസ്.ജെയില്‍ നിന്ന് ആദ്യകുര്‍ബാനയും സ്വീകരി ച്ചു. 2016ല്‍ അധ്യാപന ജീവിത ത്തില്‍ നിന്നും റിട്ടയര്‍ ചെയ്ത് ദൈവരാജ്യ വളര്‍ച്ചയിലെ ശുശ്രൂഷകളില്‍ വ്യാപൃതയായിരിക്കുന്നു. ഏകസ്ഥ ജീവിതം നയിക്കുന്ന മേരി ഹേമലത തൃശൂര്‍ നിവാസിയാണ്.

 
 
 

Comments


Kairos USA

Kairos INDIA

Kairos UK

     Kairos International Inc. 700 Louisiana St, Houston, TX. USA 77002

     Kairos Media, No 8/174, Navodaya Studio Complex, Thengod P.O, Cochin, Kerala, India. Pin: 682030

     Kairos Media, St Charles Street, Sheffield S9 3WU, United Kingdom

COPYRIGHT © 2021 KAIROS MEDIA, JESUS YOUTH

bottom of page