ഹൃദയമേ കേൾക്കുക |കവര്സ്റ്റോറി | ബിലാസ് ജോസഫ് |KAIROS MALAYALAM | JANUARY 2025


കേള്വി ദൈവത്തിന്റെ ദാനമാണ്. കേള്വിശക്തി ഉള്ളതുകൊണ്ടുമാത്രം നാം കേള്ക്കണമെന്നില്ല. അതിന് നമ്മുടെ മനസ്സിന്റെ, ഹൃദയത്തിന്റെ സാന്നിധ്യം അല്ലെങ്കില് സഹായം ആവശ്യമാണ്. എല്ലാം കേള്ക്കുന്നവരുണ്ടാകും, എന്നാല് എല്ലാം ഗ്രഹിക്കുന്നവര് വിരളവും. എന്റെ വിഷമം, സങ്കടം, ആനന്ദം, വിരഹം എന്നീ വികാര വിചാരങ്ങള് പ്രകടിപ്പിക്കാന് ഏറ്റവും ആവശ്യമായത് നല്ലൊരു കേള്വിക്കാരന് അല്ലെങ്കില് കേള്വിക്കാരി ഉണ്ടാവുക എന്നതാണ്. കേള്ക്കുക എന്നത് മനുഷ്യ ജീവിതത്തിന്റെ അത്യന്താപേക്ഷിത ഘടകങ്ങളിലൊന്നാണ്. ഇത് വിശ്വാസത്തിന്റെയും ആത്മീയതയുടെയും ഒരു ഒത്തുചേരലാണ്. ബൈബിളും വിശുദ്ധരുടെ പഠനങ്ങളും എല്ലാം നമ്മെ ഓര്മപ്പെടുത്തുന്നത്, ദൈവത്തിന്റെ വചനത്തെ കേള്ക്കുകയെന്നതാണ് ആത്മീയ ജീവിതത്തിന്റെ അടിസ്ഥാനം എന്നാണ്. ''എന്റെ വാക്ക് ശ്രദ്ധിക്കുന്നവന് സുരക്ഷിതനായിരിക്കും; അവന് തിന്മയെ ഭയപ്പെടാതെ സ്ഥനായിരിക്കും'' (സുഭാ 1, 33). ഈ സന്ദേശം, കേള്ക്കലിന്റെ ആത്മീയ പാരമ്പര്യ
ത്തിന്റെ വാതില് നമ്മിലേക്ക് തുറക്കുന്നു.
ലോകരക്ഷകനായ യേശുക്രിസ്തുവിന്റെ ജീവിതവും പ്രവൃത്തിയും കേള്ക്കലിന്റെ മഹത്ത്വത്തിന് ശുദ്ധമായ ഉദാഹരണമാണ്. ''അരുളിച്ചെയ്താലും, അങ്ങയുടെ ദാസനിതാ ശ്രവിക്കുന്നു'' (1 സാമു 3,10) എന്ന സാമുവേലിന്റെ മനനവും നമ്മെ ഈ ചിന്തയിലേക്ക് നയിക്കുന്നു. ദൈവിക സന്ദേശങ്ങളെ സ്വീകരിക്കുന്നതിലൂടെ ജീവിതത്തില് നവീകരണത്തിന്റെ അനുഭവം സാധ്യമാകുമെന്ന് അനേകം വിശുദ്ധരുടെയും പൂര്വപിതാക്കന്മാരുടെയും ജീവിതം നമ്മെ അനുസ്മരിപ്പിക്കുന്നു.
യേശുവിന്റെ ജീവിതത്തില്, സമൂഹത്തിന്റെ വിളികളോട് അനുഭാവത്തോടെ പ്രതികരിക്കുന്ന ഒരു മാതൃകയാണ് നമ്മെ കാണിക്കുന്നത്. അവന്റെ പ്രസംഗങ്ങളും അവിശ്വസിക്കുന്നവര്ക്കുള്ള ഉത്തരങ്ങളും അവിശ്വസനീയമായ കേള്ക്കലിന്റെ ഉദാഹരണങ്ങളാണ്. സാമുവേലിന്റെ ദൈവിക വിളിയും, ഗിദയോന്റെ യുദ്ധവീര്യവും, സക്കേവൂസിന്റെ പരിവര്ത്തനവും, സാവൂളിനെ പൗലോസാക്കിയതും എല്ലാം കേള്ക്കലിലൂടെ ജീവിതം മാറ്റിയ സംഭവങ്ങളാണ്.
കുടുംബത്തില് കേള്ക്കലിന്റെ ആവശ്യകത
വിശുദ്ധ ബൈബിളിലൂടെ ദൈവവചനം നമ്മുടെ മുന്നില് പ്രകാശിപ്പിക്കുന്ന കേള്ക്കലിന്റെ അര്ഥം മനസ്സിലാക്കുന്നത് നമ്മുടെ ആത്മീയ ജീവിതത്തന്റെ നിര്ണായക ഘടകമാണ്. ''നിങ്ങള്ക്കു നന്മ കൈവരുന്നതിനും ഭൂമിയില് ദീര്ഘകാലം ജീവിക്കുന്നതിനുംവേണ്ടി മാതാവിനെയും പിതാവിനെയും ബഹുമാനിക്കുക'' (എഫേ 6, 2) എന്ന് ദൈവവചനത്തിലൂടെ വി. പൗലോസ് നമ്മെ പഠിപ്പിക്കുന്നു.
കേള്ക്കലിന്റെ ആദ്യ പാഠം പഠിപ്പിക്കുന്ന വിദ്യാലയമാണ് കുടുംബം. മാതാപിതാക്കള് കുട്ടികളോട് മനസ്സു തുറന്ന് സംസാരിക്കുകയും അവരുടെ ആശങ്കകളെയും ആഗ്രഹങ്ങളെയും കേള്ക്കുകയും ചെയ്യു
മ്പോള് അവരില് ആത്മവിശ്വാസം വളര്ന്നു വരുന്നു. കുടുംബങ്ങളില്, മാതാപിതാക്കളും കുട്ടികളും തമ്മിലുള്ള ദൈവികബന്ധം കേള്ക്കലിലൂടെയാണ് വര്ധിക്കുന്നത്. മക്കള് മാതാപിതാക്കളെയും മാതാപിതാക്കള് മക്കളെയും കേള്ക്കാന് സമയം കണ്ടെത്തേണ്ടത് ഇന്നിന്റെ ആവശ്യകതയാണ്. ബഹുമാനം അനുസരണം മാത്രമല്ല, പരസ്പരം മനസ്സിലാക്കലും കൂടിയാണ്. ഇതിന് തുറന്നമനസ്സോടെ അങ്ങോട്ടും ഇങ്ങോട്ടും പറയാനുള്ളത് പറയുകയും കേള്ക്കാനുള്ളത് കേള്ക്കുകയും വേണം.പരിശുദ്ധ മറിയത്തിന്റെ ദൈവിക വിളിയുടെ അനുഭവം കുടുംബ ജീവിതത്തിന് ഉത്തമ മാതൃകയാണ്. ''ഇതാ, കര്ത്താവിന്റെ ദാസി! നിന്റെ വാക്ക് എന്നില് നിറവേറട്ടെ!'' (ലൂക്കാ 1, 38) എന്ന് പറഞ്ഞ പരിശുദ്ധ കന്യകാമറിയം, കുടുംബങ്ങളുടെ അര്പ്പണത്തിന്റെയും കേള്ക്കലിന്റെയും പ്രചോദനമായിത്തീരുന്നു. പരിശുദ്ധ കന്യകാമറിയത്തിന്റെ ഉത്തരം കേള്ക്കലിന്റെ മാനസിക ആഖ്യാനമാണ്: ദൈവത്തെ കേള്ക്കുക, അവന്റെ വിളിയെ സ്വീകരിക്കുക, തങ്ങളുടെ ജീവിതം ദൈവത്തിന്റെ ഹിതമനുസരിച്ചുളളതാക്കി മാറ്റുക.
യുവാക്കള് കുടുംബങ്ങളില് കേള്ക്കലിന്റെ മൂല്യങ്ങള് ഉള്ക്കൊള്ളുന്നതിന് അനുകരിക്കേണ്ടതായ ഒരു മാതൃക വിശുദ്ധ അഗസ്റ്റിന് പഠിപ്പിക്കുന്നു. ''ശാന്തതയില് ദൈവം സംസാരിക്കുന്നു.'' അതിലൂടെ യുവാക്കള്ക്ക് ആത്മാവിന്റെ ആഴങ്ങള് വരെ കടന്നുപോകാന് കഴിയും.
യുവാക്കളുടെ ആത്മീയ യാത്ര
കേള്ക്കുക എന്നത് യുവാക്കളെ ദൈവവചനത്തിന്റെയും സമൂഹത്തിന്റെയും സമഗ്ര പങ്കാളികളാക്കുന്നു. ദേവാലയങ്ങളിലും പ്രാര്ഥനാലയങ്ങളിലും ജോലിസ്ഥലങ്ങളിലും യാത്രാവേളകളിലുമെല്ലാം യുവാക്കള് കേള്ക്കുന്ന ദൈവവചനങ്ങള് അവരുടെ ജീവിതത്തില് ദൈവികപ്രബോധനം നല്കുന്ന അദൃശ്യശക്തിയായി മാറുന്നു. ''കേള്ക്കല് സ്നേഹത്തിന്റെ ആദ്യ ചുവടാണ്'' ഫ്രാന്സിസ് മാര്പാപ്പ പറഞ്ഞ ഈ വാക്കുകളില് നിന്ന് യുവജനങ്ങള് പ്രചോദനം ഉള്ക്കൊള്ളുകയും സമൂഹത്തില് സ്നേഹത്തിന്റെ വിത്തുകള് വിതറുകയും ചെയ്യണം.
സമൂഹത്തില് കേള്ക്കലിന്റെ പങ്ക്
മറ്റുള്ളവരെ കേള്ക്കുന്നതിലൂടെ സമൂഹത്തില് നീതിയും സാഹോദര്യവും സ്ഥാപിക്കാനാകുന്നു. ''ഞാനെന്തിന് ജീവിക്കുന്നു?'' എന്ന ചോദ്യത്തിന് മറുപടി തേടുന്ന ഓരോ വ്യക്തിയുടേയും ജീവിതത്തില് ശ്രവണം അനിവാര്യമാണ്. വി. ജോണ് പോള് രണ്ടാമന്റെ വാക്കുകള് ഈ അവസരത്തില് സ്മരണീയമാണ്: ''ആദ്യം കേള്ക്കുക, പിന്നെ പ്രവര്ത്തിക്കുക.''
സമൂഹത്തിലെ അനാഥരും പാവപ്പെട്ടവരും പലതും ആവശ്യപ്പെട്ടുകൊണ്ട് പറയുന്നവ കേള്ക്കുന്നത് നമ്മളില് മനുഷ്യത്വമുണ്ട് എന്നതിന്റെ തെളിവാണ്. വിശുദ്ധ മാര്ട്ടിന് ഡി പോറസിന്റെ ജീവിതവും സന്ദേശവും വാക്കുകളും ഈ സമൂഹത്തിനെ ശ്രവിക്കേണ്ട ആവശ്യകതയെക്കുറിച്ച് നമ്മെ ആത്മീയമായി പ്രചോദിപ്പിക്കുന്നു, ഉദ്ബോധിപ്പിക്കുന്നു. ''കേള്ക്കല് ദൈവത്തിന്റെ ശബ്ദമാണ്,
പ്രവര്ത്തനമാണ് നിങ്ങളുടെ വിളി''
ആത്മീയ ജീവിതത്തിലെ കേള്ക്കലിന്റെ രഹസ്യങ്ങള്
ശ്രവണത്തിലൂടെ ദൈവത്തിന്റെ വചനങ്ങളെ മനസ്സിലാക്കാനും അവയെ ജീവിതത്തിന്റെ പ്രവൃത്തിപദത്തിലേക്ക് കൊണ്ടുവരാനും നമുക്ക് കഴിയുന്നു. പ്രാര്ഥനയുടെ ശാന്തമായ ഘട്ടത്തില് ദൈവത്തെ നേരിട്ട് അനുഭവിക്കുന്നത് ആത്മീയ യാത്രയുടെ കാതലായ ഭാഗമാണ്. ''ദൈവം നിങ്ങളോട് എന്ത് പറയാന് ഉദ്ദേശിക്കുന്നു, അത് ശ്രദ്ധിക്കുക'' എന്ന വിശുദ്ധ തെരേസയുടെ വാക്കുകള് ഈ അവസരത്തില് വളരെ ശ്രദ്ധേയമാണ്.
ശ്രവിക്കുക എന്നത് ആത്മീയതയുടെ ഹൃദയമാണ്. കുടുംബത്തിലും സമൂഹത്തിലും വിശ്വാസത്തിലും, മനുഷ്യന് കേള്ക്കലിന്റെ പാഠങ്ങള് ജീവിച്ച് അനുഗ്രഹങ്ങള് നേടുന്നു. വിശുദ്ധ അഗസ്റ്റിന് പറഞ്ഞതുപോലെ, ''ദൈവത്തെ കേള്ക്കുക, അവന്റെ വചനങ്ങള് നിങ്ങളുടെ ഹൃദയത്തില് ഉറച്ചു നില്ക്കട്ടെ.''മറ്റുള്ളവരെ കേള്ക്കാനും അവരുടെ ആവശ്യം മനസ്സിലാക്കാനും പരിശ്രമിക്കുന്നത് നമ്മുടെ ദൈവിക ദൗത്യം ശരിയായി നിറവേറ്റുന്നതിന് സഹായകരമാകും. ഈ കേള്ക്കല് നമ്മെ ദൈവത്തോടൊന്നിച്ചുള്ള സ്നേഹത്തിന്റെയും സഖ്യത്തിന്റെയും വിളിയില് പങ്കാളികളാക്കുന്നു.
നാം ഓരോരുത്തരുടെയും ജീവിതത്തില് മറ്റുള്ളവരെയും നമ്മെത്തന്നെയും കേള്ക്കുവാനായി നമ്മള് സമയം മാറ്റി വയ്ക്കുന്നത്തിലൂടെ ഇനിയുള്ള പുതിയ തലമുറ ദൈവത്തിന്റെ ശബ്ദത്തെയും സഹോദരങ്ങളുടെ തേങ്ങലുകളെയും സമൂഹത്തിന്റെ നിലവിളികളെയും കേള്ക്കാന് സന്നദ്ധരായിരിക്കട്ടെ!
''സത്യം സത്യമായി ഞാന് നിങ്ങളോടു പറയുന്നു, എന്റെ വചനം കേള്ക്കുകയും എന്നെ അയച്ചവനെ വിശ്വസിക്കുകയും ചെയ്യുന്നവനു നിത്യജീവനുണ്ട്. അവനു ശിക്ഷാവിധി ഉണ്ടാകുന്നില്ല. പ്രത്യുത, അവന് മരണത്തില്നിന്നു ജീവനിലേക്കു കടന്നിരിക്കുന്നു'' (യോഹ 5, 24)

അധ്യാപകനും എഴുത്തുകാരനുമായ ബിലാസ് ജോസഫ് ഭാര്യക്കും അഞ്ചു മക്കൾക്കും ഒപ്പം പാലായിൽ താമസിക്കുന്നു.



Comments